ಕರ್ನಾಟಕಕ್ಕೆ ರಣಜಿ ಕಿರೀಟ: ೨೦೧೩-೧೪.

15 ವರ್ಷಗಳು, 116 ಪಂದ್ಯಗಳು, ಒಂದು ಫೈನಲ್, ಒಂದು ಪ್ಲೇಟ್ ರಣಜಿ ಟ್ರೋಫಿ ಗೆಲುವು, 3 ಸೆಮಿ ಫೈನಲ್, 4 ಕ್ವಾರ್ಟರ್ ಫೈನಲ್, 5 ಬಾರಿ ಲೀಗ್ ಹಂತದಲ್ಲೇ ಕೊನೆ ಹಾಗೂ 51 ಕ್ರಿಕೆಟಿಗರ ಪ್ರಯತ್ನದ ಬಳಿಕ ಮತ್ತೊಮ್ಮೆ ಕರ್ನಾಟಕ, ರಾಷ್ಟ್ರದ ಅತ್ಯುನ್ನತ ಕ್ರಿಕೆಟ್ ಪ್ರಶಸ್ತಿಯಾಗಿರುವ ರಣಜಿ ಟ್ರೋಫಿಯನ್ನು ಗೆದ್ದಿದೆ.

2010ರ ಮೈನವಿರೇಳಿಸಿದ್ದ ಫೈನಲ್ ಪಂದ್ಯದ ಬಳಿಕ ರಾಜ್ಯ ತಂಡ ಮತ್ತೆ ಆ ಹಂತಕ್ಕೆ ತಲುಪಿದ್ದು ನಾಲ್ಕು ವರ್ಷಗಳ ಬಳಿಕ. ಇಸವಿ 2000ದಿಂದ ಕಾದು ಕಾದು ಸುಸ್ತಾಗಿದ್ದ ನನಗೆ, 2010ರ ಫೈನಲ್ ಅಂತೂ 2-3 ದಿನಗಳ ಕಾಲ ಮಂಕು ಬಡಿದ ಅನುಭವ ನೀಡಿತ್ತು. ಆ ಸೋಲಿನಿಂದ ಚೇತರಿಸಿಕೊಳ್ಳಲು ನಾಲ್ಕಾರು ದಿನಗಳೇ ಬೇಕಾದವು. ಆದರೆ ಈ ಬಾರಿ ನಮ್ಮ ಹುಡುಗರು ಭರ್ಜರಿ ಆಟವನ್ನಾಡಿ ಪಕ್ಕಾ ವೃತ್ತಿಪರ ಪ್ರದರ್ಶನ ನೀಡಿ ಮತ್ತೆ ರಣಜಿ ಟ್ರೋಫಿ ಕರ್ನಾಟಕಕ್ಕೆ ತಂದಿದ್ದಾರೆ.

ಈಗ ೧೫ ವರ್ಷಗಳ ಹಿಂದಕ್ಕೆ ಹೋಗೋಣ. ಆಗ ನಾನು ಚೆನ್ನೈನಲ್ಲಿ ನೌಕರಿ ಮಾಡುತ್ತಿದ್ದೆ. ಅಂದು ಎಪ್ರಿಲ್ 23, 1999. ಕರ್ನಾಟಕ - ಮಧ್ಯಪ್ರದೇಶ ನಡುವಿನ ರಣಜಿ ಫೈನಲ್ ಪಂದ್ಯದ ಕೊನೆಯ ದಿನ. ಮೊದಲ ಇನ್ನಿಂಗ್ಸಿನಲ್ಲಿ ಹಿನ್ನಡೆ ಅನುಭವಿಸಿದ್ದ ಕರ್ನಾಟಕಕ್ಕೆ ರಣಜಿ ಟ್ರೋಫಿ ಗೆಲ್ಲಬೇಕಾದರೆ, ಪಂದ್ಯ ಗೆಲ್ಲಲೇಬೇಕಾಗಿತ್ತು. ಮಧ್ಯಪ್ರದೇಶಕ್ಕೆ ಟ್ರೋಫಿ ಗೆಲ್ಲಲು ಪಂದ್ಯವನ್ನು ಡ್ರಾ ಮಾಡಿಕೊಂಡರೆ ಸಾಕಿತ್ತು. ನಾಲ್ಕನೇ ದಿನದಾಟದ ಕೊನೆಗೆ ತನ್ನ ಎರಡನೇ ಇನ್ನಿಂಗ್ಸಿನಲ್ಲಿ ಕರ್ನಾಟಕ ಏಳು ಹುದ್ದರಿಗಳ ನಷ್ಟಕ್ಕೆ 321 ಓಟಗಳನ್ನು ಗಳಿಸಿ ಒಟ್ಟಾರೆ 246 ಓಟಗಳಿಂದ ಮುಂದಿತ್ತು.

ಆ ದಿನ ಆಫೀಸಿಗೆ ಹೋದಾಗ ನನ್ನ ಎಲ್ಲಾ ಸಹೋದ್ಯೋಗಿಗಳ ಮುಖದ ಮೇಲೆ ನಗು. ಕರ್ನಾಟಕ ಈಗ ಗೆಲ್ಲಲು ಸಾಧ್ಯವೇ ಇಲ್ಲ ಎಂಬ ವಿಕೃತ ನಗು! ’ಯುವರ್ ಕರ್ನಾಟಕ ಹ್ಯಾಸ್ ನೋ ಚಾನ್ಸ್’, ’ಯು ಕ್ಯಾನ್ ಫರ್ಗೆಟ್ ಅಬೌಟ್ ರಣಜಿ ಟ್ರೋಫಿ’, ’ಬೆಟರ್ ಲಕ್ ನೆಕ್ಸ್ಟ್ ಇಯರ್’ ಎಂಬೆಲ್ಲಾ ಮಾತುಗಳು. ನಾನು, ಕರ್ನಾಟಕ ಕರ್ನಾಟಕ ಎಂದು ಜಪಿಸುತ್ತಿದ್ದ ಪರಿಯನ್ನು ಕಂಡು ಅವರೆಲ್ಲರಿಗೂ ಈ ಫೈನಲ್ ಪಂದ್ಯದ ಮೇಲೆ ವಿಪರೀತ ಆಸಕ್ತಿ.

ಅಂದು ಕೆಲಸದ ಮೇಲೆ ಗಮನ ಇರಲೇ ಇಲ್ಲ. ದೂರದ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಏನಾಗುತ್ತಿರಬಹುದು ಎಂಬ ಕುತೂಹಲ. ಸಹೋದ್ಯೋಗಿಯೊಬ್ಬ ಮಧ್ಯಾಹ್ನ ಮನೆಗೆ ಹೊರಟಾಗ ಆತನಿಗೆ ಟ್ರಾನ್ಸಿಸ್ಟರ್ ತರುವಂತೆ ವಿನಂತಿಸಿದೆ. ಮಧ್ಯಾಹ್ನ 2.25ರ ಪ್ರದೇಶ ಸಮಾಚಾರದಲ್ಲಿ - "ಗೆಲ್ಲಲು 247ರ ಗುರಿ ಹೊತ್ತ ಮಧ್ಯಪ್ರದೇಶ, ಈಗ ಸ್ವಲ್ಪ ಹೊತ್ತಿನ ಮೊದಲು 3 ಹುದ್ದರಿಗಳ ನಷ್ಟಕ್ಕೆ 106 ಓಟಗಳನ್ನು ಗಳಿಸಿತ್ತು" ಎಂದು ಮಾಹಿತಿ ನೀಡಲಾಯಿತು. ಇನ್ನು ಹೆಚ್ಚೆಂದರೆ 30 ಓವರುಗಳ ಆಟವಿರಬಹುದು. ಕರ್ನಾಟಕಕ್ಕೆ ಚಾನ್ಸ್ ಇಲ್ಲ ಎಂದು ಅರಿವಾಗತೊಡಗಿತು. 106ಕ್ಕೆ 3 ಎಂಬ ಸ್ಕೋರ್ ತಿಳಿದು ಸಹೋದ್ಯೋಗಿಗಳಿಗೆಲ್ಲ ಅಪರಿಮಿತ ಸಂತೋಷ!!

ಮರುದಿನ ಬೆಳಗ್ಗೆ ’ದಿ ಹಿಂದೂ’ ಪತ್ರಿಕೆಯಲ್ಲಿ ಕರ್ನಾಟಕ ರಣಜಿ ಟ್ರೋಫಿಯೊಂದಿಗೆ ಪೋಸ್ ನೀಡಿದ ಚಿತ್ರ ನೋಡಿ ನಂಬಲಾಗಲಿಲ್ಲ. ’ವಿಜಯ್ ಭಾರದ್ವಾಜ್ ಸ್ಪಿನ್ಸ್ ಕರ್ನಾಟಕ ಟು ರಣಜಿ ಗ್ಲೋರಿ’ ಎಂಬ ಶೀರ್ಷಿಕೆ! ವಿಜಯ್ ಭಾರದ್ವಾಜ್ 15 ಓವರುಗಳಲ್ಲಿ 24 ರನ್ನುಗಳನ್ನು ನೀಡಿ 6 ಹುದ್ದರಿಗಳನ್ನು ಉಡಾಯಿಸಿಬಿಟ್ಟಿದ್ದರು. 106ಕ್ಕೆ 3 ಇದ್ದ ಮಧ್ಯಪ್ರದೇಶ 150ಕ್ಕೆ ಆಲ್ ಔಟ್ ಆಗಿಬಿಟ್ಟಿತ್ತು! ಪಂದ್ಯದ ಕೊನೆಯ 31 ಚೆಂಡುಗಳು ಮಾತ್ರ ಉಳಿದಿದ್ದವು!! ಆ ಪಂದ್ಯದ ಸ್ಕೋರ್ ಕಾರ್ಡ್ ಇಲ್ಲಿದೆ.

ಅಂದು ಆಫೀಸಿನಲ್ಲಿ, ’ಹೌ ಡಿಡ್ ದೆ ಮ್ಯಾನೇಜ್ ಟು ವಿನ್, ಮ್ಯಾನ್’, ’ಹೌ ಕ್ಯಾನ್ ಇಟ್ ಬಿ ಪಾಸಿಬಲ್’, ಎಂಬಿತ್ಯಾದಿ ಶಾಕ್ ಭರಿತ ಕಮೆಂಟುಗಳ ನಡುವೆ ಎಲ್ಲಾ ಸಹೋದ್ಯೋಗಿಗಳಿಗೂ ಸಿಹಿ ಹಂಚಿದೆ. ಕರ್ನಾಟಕದ ಪತಾಕೆಯನ್ನು ಇನ್ನಷ್ಟು ಹಾರಿಸಿದೆ.

ಆಗ ರಾಜ್ಯ ತಂಡ ನಾಲ್ಕು ವರ್ಷಗಳಲ್ಲಿ ಮೂರನೇ ಬಾರಿ ಪ್ರಶಸ್ತಿ ಗೆದ್ದಿತ್ತು. 1995-96 ಋತುವಿನಲ್ಲಿ ಅನಿಲ್ ಕುಂಬ್ಳೆ ನೇತೃತ್ವದಲ್ಲಿ ಹಾಗೂ 1997-98ರಲ್ಲಿ ರಾಹುಲ್ ದ್ರಾವಿಡ್ ನೇತೃತ್ವದಲ್ಲಿ ರಣಜಿ ಟ್ರೋಫಿ ಕರ್ನಾಟಕದ್ದಾಗಿತ್ತು. ಮುಂದಿನ ವರ್ಷವೇ (1998-99) ಸುನಿಲ್ ಜೋಶಿ ನೇತೃತ್ವದಲ್ಲಿ ಗೆದ್ದಿದ್ದು. ತದನಂತರ 15 ವರ್ಷ ಕಾಯಬೇಕಾಗಿ ಬಂತು.

1998-99 ರ ವಿಜೇತ ತಂಡ: ಸುನಿಲ್ ಜೋಶಿ (ನಾಯಕ), ಸುಜಿತ್ ಸೋಮಸುಂದರ್, ಜೆ ಅರುಣ್ ಕುಮಾರ್, ಎ ವಿಜಯ್, ಆರ್ ವಿಜಯ್ ಭಾರದ್ವಜ್, ಸೋಮಶೇಖರ್ ಶಿರಗುಪ್ಪಿ, ತಿಲಕ್ ನಾಯ್ಡು, ಬಿ ಅಖಿಲ್, ಆನಂದ್ ಯಾಲ್ವಿಗಿ, ದೊಡ್ಡನರಸಯ್ಯ ಗಣೇಶ್ ಹಾಗೂ ಮನ್ಸೂರ್ ಅಲಿ ಖಾನ್.

2013-14ರ ಋತುವಿನ ಆರಂಭದಲ್ಲಿ ತಂಡದಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಲಾಯಿತು. ಆರಕ್ಕೇರದ ಮೂರಕ್ಕಿಳಿಯದ ಸ್ಥಿತಿಯಲ್ಲಿದ್ದ ಅಮಿತ್ ವರ್ಮಾರನ್ನು ಕೈಬಿಡಲಾಯಿತು. ಅಮಿತ್, ಕಳೆದ ಋತುವಿನಲ್ಲಿ (2012-13) ಕೇವಲ 27.67 ಸರಾಸರಿಯಲ್ಲಿ 249 ರನ್ನುಗಳನ್ನು ಗಳಿಸಿದ್ದರು. ಕಳೆದ ಋತುವಿನ ನಡುವಿನಲ್ಲೇ ತಂಡದಿಂದ ಕೈಬಿಡಲ್ಪಟ್ಟಿದ್ದ ಆರಂಭಿಕ ಆಟಗಾರ ಕೆ ಬಿ ಪವನ್‌ರನ್ನು ಆಯ್ಕೆಗಾರರು ಪರಿಗಣಿಸಲೇ ಇಲ್ಲ. ತನ್ನನ್ನು ಆಯ್ಕೆಗೆ ಪರಿಗಣಿಸಲಾಗುವುದಿಲ್ಲ ಎಂಬುವುದನ್ನು ಮೊದಲೇ ಅರಿತಿದ್ದ ಪವನ್, ಈ ಋತುವಿನಲ್ಲಿ ತ್ರಿಪುರಾ ಪರವಾಗಿ ಆಡಿದರು. ಅಲ್ಲೂ ವೈಫಲ್ಯ (ಎಂಟು ಪಂದ್ಯಗಳಲ್ಲಿ 24.93 ಸರಾಸರಿಯಲ್ಲಿ 374 ರನ್ನುಗಳು) ಕಂಡರು. ಸ್ಪಿನ್ ಬೌಲರುಗಳಾಗಿರುವ ಕೆ ಗೌತಮ್ ಹಾಗೂ ಸಯ್ಯದ್ ಮೊಯ್ನುದ್ದೀನ್‌ರನ್ನು ಕೈಬಿಡಲಾಯಿತು. ಆಲ್‌ರೌಂಡರ್ ಆಗಿರುವ ಸುನಿಲ್ ರಾಜು ಕೂಡಾ ತಂಡದಲ್ಲಿ ಸ್ಥಾನ ಪಡೆಯಲಿಲ್ಲ. ವೇಗದ ಬೌಲರ್ ಎಸ್ ಎಲ್ ಅಕ್ಷಯ್, ಉತ್ತಮ ಪ್ರದರ್ಶನದ ಹೊರತಾಗಿಯೂ, ಶರತ್ ಹಾಗೂ ರೋನಿತ್ ಮೋರೆಯ ಪ್ರತಿಭೆಯ ಮುಂದೆ ತಂಡದಲ್ಲಿ ಸ್ಥಾನ ಪಡೆಯಲು ವಿಫಲರಾದರು.

ಯುವ ಆಟಗಾರರಾಗಿರುವ ರವಿಕುಮಾರ್ ಸಮರ್ಥ್ ಹಾಗೂ ಕರುಣ್ ನಾಯರ್, ಕ್ರಮವಾಗಿ ಶಫಿ ದಾರಾಶಹಾ ಹಾಗೂ 22 ಹಾಗೂ 25ರ ವಯೋಮಿತಿ ಪಂದ್ಯಾಟಗಳಲ್ಲಿ ಭರ್ಜರಿ ಪ್ರದರ್ಶನ ನೀಡಿದಾಗ, ಅವರಿಬ್ಬರನ್ನು ಕಡೆಗಣಿಸಲು ಆಯ್ಕೆಗಾರರಿಗೆ ಸಾಧ್ಯವಾಗಲಿಲ್ಲ. ಸ್ಪಿನ್ ಬೌಲರ್ ಅಬ್ರಾರ್ ಕಾಝಿ ಕೂಡಾ ತಂಡದಲ್ಲಿ ಸ್ಥಾನ ಪಡೆದರು.

ಕರ್ನಾಟಕದ ಯಶಸ್ಸಿಗೆ ಮುಖ್ಯ ಕಾರಣವೆಂದರೆ, ಎಲ್ಲಾ ಅಟಗಾರರು ರನ್ನುಗಳನ್ನು ಗಳಿಸಿರುವುದು. ಒಟ್ಟಾರೆ ಈ ಋತುವಿನಲ್ಲಿ ರಾಜ್ಯದ 9 ಆಟಗಾರರು, 15 ಶತಕಗಳನ್ನು ದಾಖಲಿಸಿದ್ದಾರೆ. ಬೇರೆ ಯಾವ ತಂಡದಿಂದಲೂ ಇಷ್ಟು ಶತಕಗಳು ದಾಖಲಿಸಲ್ಪಟ್ಟಿಲ್ಲ. ಅಷ್ಟೇ ಅಲ್ಲದೆ, ರಾಜ್ಯದ 10 ಆಟಗಾರರು, 20 ಅರ್ಧಶತಕಗಳನ್ನು ದಾಖಲಿಸಿದ್ದಾರೆ. ಎಂಟು ಬ್ಯಾಟ್ಸ್‌ಮನ್‌ಗಳು 40ಕ್ಕಿಂತಲೂ ಹೆಚ್ಚಿನ ಸರಾಸರಿ ಹೊಂದಿದ್ದಾರೆ. ಹೆಚ್ಚಿನ ತಂಡಗಳು ಒಂದೆರಡು ಆಟಗಾರರ ಮೇಲೆ ಅವಲಂಬಿತವಾಗಿದ್ದರೆ, ಕರ್ನಾಟಕ ತಂಡದಲ್ಲಿ ಹಾಗಿರಲಿಲ್ಲ. ಒಂದು ಪಂದ್ಯದಲ್ಲಿ ತಂಡದ ಯಾರಾದರೂ 2-3 ಬ್ಯಾಟ್ಸ್‌ಮನ್‌ಗಳು ರನ್ನುಗಳನ್ನು ಗಳಿಸಿರುವುದನ್ನು ಎಲ್ಲಾ ಪಂದ್ಯಗಳಲ್ಲಿ ಕಾಣಬಹುದು.

ಬ್ಯಾಟಿಂಗ್ ವಿಭಾಗದಲ್ಲಿ ಕೆ ಎಲ್ ರಾಹುಲ್, 10 ಪಂದ್ಯಗಳಿಂದ 68.87 ಸರಾಸರಿಯಲ್ಲಿ, 3 ಶತಕ ಹಾಗೂ 4 ಅರ್ಧಶತಕಗಳ ನೆರವಿನಿಂದ ಒಟ್ಟು 1033 ಓಟಗಳನ್ನು ಗಳಿಸಿದರು. ಈ ಋತುವಿನ ರಣಜಿ ಪಂದ್ಯಾವಳಿಯಲ್ಲಿ ಎಲ್ಲಾ ತಂಡಗಳ ಆಟಗಾರರ ಪೈಕಿ, ಅತಿ ಹೆಚ್ಚು ರನ್ನುಗಳನ್ನು ಗಳಿಸಿದ ಪಟ್ಟಿಯಲ್ಲಿ ಎರಡನೇ ಸ್ಥಾನವನ್ನು ಅಲಂಕರಿಸಿದರು. ಬೌಲಿಂಗಿನಲ್ಲಿ ಅಭಿಮನ್ಯು ಮಿಥುನ್ 41 ಹುದ್ದರಿಗಳನ್ನು ಉರುಳಿಸಿ, ಎಲ್ಲಾ ತಂಡಗಳ ಬೌಲರುಗಳ ಪೈಕಿ ಮೂರನೇ ಸ್ಥಾನ ಪಡೆದರು.

ಬ್ಯಾಟಿಂಗ್‍ನಂತೆಯೇ, ಬೌಲಿಂಗ್ ಕೂಡಾ ಕರ್ನಾಟಕದ ಗೆಲುವಿನಲ್ಲಿ ಬಹಳ ಮುಖ್ಯ ಪಾತ್ರ ವಹಿಸಿದೆ. ನಾಯಕ ವಿನಯ್ ಎಂಟು ಪಂದ್ಯಗಳಲ್ಲಿ 29 ವಿಕೆಟ್‍ಗಳನ್ನು, ಮಿಥುನ್ 10 ಪಂದ್ಯಗಳಲ್ಲಿ 41 ಹಾಗೂ ಶರತ್ 7 ಪಂದ್ಯಗಳಲ್ಲಿ 32 ವಿಕೆಟ್ ಗಳಿಸಿದ್ದಾರೆ. ಇಲ್ಲೂ ಮೂರೂ ಬೌಲರುಗಳು ಸಮಾನ ರೀತಿಯಲ್ಲಿ ಕರ್ನಾಟಕದ ಯಶಸ್ಸಿಗೆ ಕಾರಣರಾಗಿದ್ದಾರೆ.

ರಾಜ್ಯ ತಂಡಕ್ಕೆ ಒಬ್ಬ ಯೋಗ್ಯ ಸ್ಪಿನ್ ಬೌಲರ್‌ನ ಅವಶ್ಯಕತೆಯಿದೆ. ಅಪ್ಪಣ್ಣ ಹಾಗೂ ಕಾಝಿ ಕೇವಲ ಸಾಧಾರಣ ಪ್ರದರ್ಶನ ನೀಡಿದ್ದಾರೆ. ಮುಂಬೈ ವಿರುದ್ಧದ ಪಂದ್ಯದಲ್ಲಿ ತನ್ನ ಬ್ಯಾಟಿಂಗ್ ಸಾಮರ್ಥ್ಯದಿಂದ ಸ್ಥಾನ ಪಡೆದ ಶ್ರೇಯಸ್ ಗೋಪಾಲ್, ಕ್ರಮೇಣ ಉತ್ತಮ ಲೆಗ್ ಸ್ಪಿನ್ ಬೌಲರ್ ಆಗಿ ರೂಪುಗೊಳ್ಳುತ್ತಿದ್ದಾರೆ! ಅವರೀಗ ಬ್ಯಾಟಿಂಗ್‌ನ್ನೇ ಮರೆತಿರುವಂತೆ ಕಾಣಬರುತ್ತದೆ. ಕರ್ನಾಟಕ 19ರ ವಯಸ್ಸಿನ ತಂಡದ ನಾಯಕನಾಗಿ ಹಾಗೂ 22 ಮತ್ತು 25ರ ವಯೋಮಿತಿ ಪಂದ್ಯಗಳಲ್ಲಿ ಭರ್ಜರಿ ರನ್ನುಗಳನ್ನು ಸೂರೆಗೈದ ಆಧಾರದಲ್ಲಿ ಆಯ್ಕೆಗೊಂಡ ಶ್ರೇಯಸ್, ತನ್ನ ಪಾರ್ಟ್ ಟೈಮ್ ಲೆಗ್ ಸ್ಪಿನ್ ಬೌಲಿಂಗ್‌ನ್ನೇ ಫುಲ್ ಟೈಮ್ ಧಂಧೆಯನ್ನಾಗಿ ಮಾಡಿಕೊಂಡು ಉತ್ತಮ ಯಶಸ್ಸು ಕಂಡಿದ್ದಾರೆ (5 ಪಂದ್ಯಗಳು, ಬ್ಯಾಟಿಂಗ್ ಸರಾಸರಿ - 9.67, ಬೌಲಿಂಗ್ - 18.23 ಸರಾಸರಿಯಲ್ಲಿ 22 ವಿಕೆಟ್‌ಗಳು).

ವಿಕೆಟ್ ಕೀಪರ್ ಸಿ ಎಮ್ ಗೌತಮ್, ಹೆಚ್ಚು ರನ್ನುಗಳನ್ನು ಗಳಿಸದಿದ್ದರೂ, ವಿಕೆಟ್ ಹಿಂದೆ ಒಟ್ಟು 43 ಬಲಿಗಳನ್ನು ಪಡೆದು ಹೊಸ ರಣಜಿ ರೆಕಾರ್ಡ್‌ನ್ನು ತಮ್ಮ ಹೆಸರಿಗೆ ಬರೆಸಿಕೊಂಡರು.

ಮೊದಲ 3 ಪಂದ್ಯಗಳನ್ನು ಡ್ರಾ ಮಾಡಿಕೊಂಡು ಕೇವಲ 7 ಅಂಕಗಳನ್ನು ಗಳಿಸಿ, ಅಂಕಪಟ್ಟಿಯಲ್ಲಿ ಕೊನೆಯ 2-3 ಸ್ಥಾನಗಳನ್ನು ಅಲಂಕರಿಸಿದ್ದ ಕರ್ನಾಟಕ, ನಂತರ ಎಚ್ಚೆತ್ತ ಹುಲಿಯಂತೆ ಸತತ 5 ಪಂದ್ಯಗಳನ್ನು ಗೆದ್ದು ಒಟ್ಟು 38 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿ ಮುಂದಿನ ಹಂತಕ್ಕೆ ತೇರ್ಗಡೆ ಹೊಂದಿದ್ದು, ನಾಕ್‌ಔಟ್ ಪಂದ್ಯಗಳನ್ನು ಆತ್ಮವಿಶ್ವಾಸದಿಂದ ಆಡಲು ಸಹಕಾರಿಯಾಯಿತು. ಸೆಮಿಫೈನಲ್ ಪಂದ್ಯ ಮಳೆಗೆ ಆಹುತಿಯಾಗದಿದ್ದಿದ್ದರೆ, ಸತತ ಎಂಟು ಜಯಗಳನ್ನು ಸಾಧಿಸಿದ ಅಭೂತಪೂರ್ವ ಸಾಧನೆ ರಾಜ್ಯ ತಂಡದ್ದಾಗುತ್ತಿತ್ತು.

ತಂಡದ ಯಶಸ್ಸಿನಲ್ಲಿ ಕೋಚ್‍ಗಳಾದ ಜೆ ಅರುಣ್ ಕುಮಾರ್ ಹಾಗೂ ಮನ್ಸೂರ್ ಅಲಿ ಖಾನ್ ಅವರ ಕೊಡುಗೆಯೂ ಅಪಾರ. ರಾಜ್ಯ ತಂಡ ಕೊನೆಯ ಬಾರಿಗೆ ರಣಜಿ ಟ್ರೋಫಿ ಗೆದ್ದಾಗ ಇವರಿಬ್ಬರು ಆಟಗಾರರಾಗಿದ್ದರು. 15 ವರ್ಷಗಳ ಬಳಿಕ ಮತ್ತೆ ರಣಜಿ ಟ್ರೋಫಿ ರಾಜ್ಯಕ್ಕೆ ಒಲಿದಾಗ ಇವರಿಬ್ಬರು ತಂಡದ ಕೋಚ್‍ಗಳಾಗಿರುವುದು ಒಂದು ಕಾಕತಾಳೀಯವೇ ಸರಿ. ಜ್ಯಾಕ್ - ಮ್ಯಾಕ್ ಎಂದು ಕರೆಯಲ್ಪಡುವ ಈ ಜೋಡಿಯ ಬಗ್ಗೆ ಲೇಖನವನ್ನು ಇಲ್ಲಿ ಓದಬಹುದು. ಹಾಗೇನೆ ಅರುಣ್ ಕುಮಾರ್ ಬಗ್ಗೆ ಈ ಬ್ಲಾಗಿನಲ್ಲಿರುವ ಲೇಖನವನ್ನು ಇಲ್ಲಿ ಓದಬಹುದು ಮತ್ತು ಮನ್ಸೂರ್ ಅಲಿ ಖಾನ್ ಬಗ್ಗೆ ಈ ಬ್ಲಾಗಿನಲ್ಲಿರುವ ಸಣ್ಣ ತುಣುಕನ್ನು ಇಲ್ಲಿ ಓದಬಹುದು.

ರಾಜ್ಯ ತಂಡ ರಣಜಿ ಪ್ರಶಸ್ತಿಯನ್ನು ಗೆಲ್ಲುತ್ತಿರುವುದು ಇದು ಏಳನೇ ಬಾರಿ. ಈ ಮೊದಲು ಈರಪ್ಪಳ್ಳಿ ಪ್ರಸನ್ನ (ಎರಡು ಬಾರಿ), ಬೃಜೇಶ್ ಪಟೇಲ್, ಅನಿಲ್ ಕುಂಬ್ಳೆ, ರಾಹುಲ್ ದ್ರಾವಿಡ್ ಹಾಗೂ ಸುನಿಲ್ ಜೋಶಿ ವಿಜೇತ ತಂಡದ ನಾಯಕತ್ವ ವಹಿಸುವ ಸೌಭಾಗ್ಯ ಹೊಂದಿದ್ದು, ಈ ಬಾರಿ ಆ ಭಾಗ್ಯ ವಿನಯ್ ಕುಮಾರ್‌ಗೆ ಒಲಿದಿದೆ.

2013-14 ಋತುವಿನ ಹೈಲೈಟ್ಸ್‌ಗಳು.

1. ಝಾರ್ಖಂಡ್ ವಿರುದ್ಧ ಗಣೇಶ್ ಸತೀಶ್ ಹಾಗೂ ವಿನಯ್ ಕುಮಾರ್ ಲೀಡ್ ದೊರಕಿಸಿಕೊಟ್ಟಿದ್ದು.

2. ವಿದರ್ಭ ವಿರುದ್ಧ ಲೀಡ್ ದೊರಕಿಸಿಕೊಟ್ಟ ಅಬ್ರಾರ್ ಕಾಝಿ ಹಾಗೂ ಕೆ ಪಿ ಅಪ್ಪಣ್ಣ ನಡುವಿನ 72 ರನ್ನುಗಳ ಒಂಬತ್ತನೇ ವಿಕೆಟಿನ ಜೊತೆಯಾಟ.
3. ಒಡಿಶಾ ವಿರುದ್ಧ ಪಂದ್ಯದಲ್ಲಿ 11 (6+5) ಹುದ್ದರಿಗಳನ್ನು ಕಿತ್ತ ಅಭಿಮನ್ಯು ಮಿಥುನ್.
4. ಹರ್ಯಾನಾ ವಿರುದ್ಧ ಪಂದ್ಯದಲ್ಲಿ 7 (2+5) ಹುದ್ದರಿಗಳನ್ನು ಕಿತ್ತ ರೋನಿತ್ ಮೋರೆ.
5. ಹರ್ಯಾನಾ ವಿರುದ್ಧ ಸ್ಟುವರ್ಟ್ ಬಿನ್ನಿ ವಿಜಯ ದೊರಕಿಸಿಕೊಟ್ಟ 31 ಅಮೂಲ್ಯ ರನ್ನುಗಳು.
6. ಹುಬ್ಬಳ್ಳಿಯಲ್ಲಿ ನಡೆದ ಪಂಜಾಬ್ ವಿರುದ್ಧ ಪಂದ್ಯದಲ್ಲಿ ತನ್ನ ಚೊಚ್ಚಲ ಶತಕ ಗಳಿಸಿದ ವಿನಯ್ ಕುಮಾರ್.
7. ಮುಂಬೈ ವಿರುದ್ಧ ಬಿರುಸಿನ ಶತಕದ ಆಟ ಆಡಿದ ಮನೀಶ್ ಪಾಂಡೆ.
8. ಮುಂಬೈ ವಿರುದ್ಧ 8 (5+3) ಹುದ್ದರಿಗಳನ್ನು ಕಿತ್ತ ಎಚ್ ಎಸ್ ಶರತ್.
9. ದೆಹಲಿ ವಿರುದ್ಧ ಪಂದ್ಯದಲ್ಲಿ ತನ್ನ ಚೊಚ್ಚಲ ಶತಕ ಗಳಿಸಿದ ಕರುಣ್ ನಾಯರ್.
10. ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಉತ್ತರ ಪ್ರದೇಶದ ವಿರುದ್ಧ ತಂಡ 15ಕ್ಕೆ 3 ಹುದ್ದರಿಗಳನ್ನು ಕಳಕೊಂಡಾಗ, ರಾಬಿನ್ ಉತ್ತಪ್ಪ ಹಾಗೂ ಕರುಣ್ ನಾಯರ್ ಜೊತೆಯಾಟ.
11. ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ, ಉತ್ತರ ಪ್ರದೇಶದ ವಿರುದ್ಧ, ಮೊದಲ ಇನ್ನಿಂಗ್ಸ್‌ನಲ್ಲಿ, ಕರ್ನಾಟಕದ ಮೊದಲ ಆರು ಆಟಗಾರರಲ್ಲಿ, ಮೂವ್ವರು ಶೂನ್ಯಕ್ಕೆ ಔಟಾದರೆ, ಮೂವ್ವರು ಸರಿಯಾಗಿ 100 ಓಟಗಳಿಗೆ ಔಟಾದರು. ಈ ಆರು ಬ್ಯಾಟ್ಸ್‌ಮನ್‌ಗಳು ಗಳಿಸಿದ ಓಟಗಳನ್ನು ಬರೆದರೆ ಬೈನರಿ ಅಂಕೆ ತರಹ ಕಾಣಬರುತ್ತದೆ - 100000100100. ಮೂರು ಶತಕಗಳ ಹೊರತಾಗಿಯೂ ಕರ್ನಾಟಕ ಗಳಿಸಿದ್ದು 349 ಓಟಗಳನ್ನು ಮಾತ್ರ! ಇದು ರಣಜಿ ಪಂದ್ಯಗಳಲ್ಲಿ ಮೂರು ಶತಕಗಳಿದ್ದರೂ ಅತಿ ಕಡಿಮೆ ರನ್ನು ದಾಖಲಿಸಿದ ದಾಖಲೆ.
12. ಪಂಜಾಬ್ ವಿರುದ್ಧ ಸೆಮಿ ಫೈನಲ್ ಪಂದ್ಯದಲ್ಲಿ ವಿನಯ್ ಕುಮಾರ್ ಗಳಿಸಿದ 5 ಹುದ್ದರಿಗಳು.
13. ಪಂಜಾಬ್ ವಿರುದ್ಧ ಸೆಮಿ ಫೈನಲ್ ಪಂದ್ಯದಲ್ಲಿ, ’ಕಮ್‌ಬ್ಯಾಕ್ ಮ್ಯಾನ್’ ಅಮಿತ್ ವರ್ಮ ದಾಖಲಿಸಿದ ಅಜೇಯ ಶತಕ.
14. ಫೈನಲ್ ಪಂದ್ಯದಲ್ಲಿ ಮಹಾರಾಷ್ಟ್ರ ವಿರುದ್ಧ ಕೆ ಎಲ್ ರಾಹುಲ್ ಹಾಗೂ ಗಣೇಶ್ ಸತೀಶ್ ನಡುವೆ 216 ಓಟಗಳ ಜೊತೆಯಾಟ.

2013-14 ರ ವಿಜೇತ ತಂಡ: ಆರ್ ವಿನಯ್ ಕುಮಾರ್ (ನಾಯಕ), ರಾಬಿನ್ ವಿ ಉತ್ತಪ್ಪ, ಕೆ ಎಲ್ ರಾಹುಲ್, ಗಣೇಶ್ ಸತೀಶ್, ಮನೀಶ್ ಕೆ ಪಾಂಡೆ, ಕರುಣ್ ಕೆ ನಾಯರ್, ಚಿದಂಬರಮ್ ಎಮ್ ಗೌತಮ್, ಅಮಿತ್ ವರ್ಮಾ, ಶ್ರೇಯಸ್ ಗೋಪಾಲ್, ಅಭಿಮನ್ಯು ಮಿಥುನ್ ಹಾಗೂ ಶ್ರೀನಾಥ್ ಅರವಿಂದ್.
ಈ ಋತುವಿನಲ್ಲಿ ಆಡಿದ ಇತರ ಆಟಗಾರರು: ಮಯಾಂಕ್ ಎ ಅಗರ್‌ವಾಲ್, ಕುನಾಲ್ ಆರ್ ಕಪೂರ್, ಸ್ಟುವರ್ಟ್ ಟಿ ಆರ್ ಬಿನ್ನಿ, ಕೆ ಪಿ ಅಪ್ಪಣ್ಣ, ಅಬ್ರಾರ್ ಎ ಕಾಝಿ, ಹೊಸಗಾವಿ ಎಸ್ ಶರತ್, ರೋನಿತ್ ಜಿ ಮೋರೆ ಹಾಗೂ ರವಿಕುಮಾರ್ ಸಮರ್ಥ್.

ರಾಜ್ಯ ತಂಡಕ್ಕೆ ಶುಭಾಶಯಗಳು.

ಮಾಂಗ್ಟೇಶ್ವರನ ಕಡಲತೀರ

ಈ ಕಡಲತೀರಕ್ಕೆ ಯಾರೂ ಬರುವುದೇ ಇಲ್ಲ. ಊರಿನವರಲ್ಲಿ ಈ ಕಡಲತೀರಕ್ಕೆ ದಾರಿ ಕೇಳಿದರೆ, ಸ್ವಲ್ಪ ದೂರದಲ್ಲಿರುವ ಇದೇ ಹೆಸರುಳ್ಳ ಇನ್ನೊಂದು ಕಡಲತೀರಕ್ಕೆ ಕಳುಹಿಸುತ್ತಾರೆ. ನಿಖರವಾಗಿ ಕೇಳಿದರೆ ಮಾತ್ರ ಈ ಕಡಲತೀರ ನೋಡುವ ಭಾಗ್ಯ. ಇದು ನನಗೆ ಲೀನಾ ನೀಡಿದ ಮಾಹಿತಿ.

ಲೀನಾ, ಇದೇ ಊರಿನಲ್ಲಿ ನಾಲ್ಕೈದು ವರ್ಷ ಇದ್ದುದರಿಂದ ನನಗೆ ಕಡಲತೀರಕ್ಕೆ ದಾರಿ ಕೇಳುವ ಪ್ರಮೇಯ ಬರಲಿಲ್ಲ. ಆದರೂ ನೋಡೋಣವೆಂದು ಎರಡು ಕಡೆ ದಾರಿ ಕೇಳಿದೆ. ಊರವರು ಮತ್ತು ಪ್ರವಾಸಿಗರು ತೆರಳುವ ಆ ಮತ್ತೊಂದು ಕಡಲತೀರಕ್ಕೇ ನನಗೆ ದಾರಿ ತೋರಿಸಲಾಯಿತು. ಮತ್ತೆ ನಿಖರವಾಗಿ ಕೇಳಿದೆ. ಆಗ ನನಗೆ ಈ ಕಡಲತೀರದ ಬಗ್ಗೆ ತಿಳಿಸಲಾಯಿತು!!

ಅದೇನೇ ಇರಲಿ. ಯಾರೂ ಬರದಿದ್ದರೆ ಒಳ್ಳೆಯದೆ ತಾನೆ? ಇಲ್ಲಿ ತೀರಗುಂಟ ಜನವಸತಿ ಪ್ರದೇಶವಾಗಿದ್ದು, ಇವರ ಮುಖ್ಯ ಕಸುಬೇ ಮೀನು ಹಿಡಿಯುವುದು. ಮಣ್ಣಿನ ನೆಲ ಮುಗಿಯುವವರೆಗೆ ಮನೆಗಳಿದ್ದು, ಮರಳಿನ ನೆಲ ಆರಂಭವಾಗುವಲ್ಲಿ ಸಾಲಾಗಿ ದೋಣಿಗಳನ್ನು ನಿಲ್ಲಿಸಲಾಗಿತ್ತು. ಇಲ್ಲಿಗೆ ಬಸ್ಸು ಸೌಕರ್ಯ ಇಲ್ಲ. ಊರಿನಿಂದ ಕೇವಲ ೩ ಕಿಮಿ ದೂರ ಇರುವ ಈ ಸ್ಥಳಕ್ಕೆ ರಿಕ್ಷಾಗಳು ಓಡಾಡುತ್ತವೆ.

ಈ ಸ್ಥಳಕ್ಕೆ ಬರಲು ಇರುವ ಒಂದೇ ಕಾರಣವೆಂದರೆ ತೀರದಿಂದ ಸುಮಾರು ನೂರು ಮೀಟರುಗಳಷ್ಟು ದೂರದಲ್ಲಿರುವ ಒಂದು ನಡುಗುಡ್ಡೆ. ಇಲ್ಲಿಗೆ ತೆರಳಲು ಕಲ್ಲುಗಳನ್ನು ಹಾಕಿ ಕಲ್ಲುಸೇತು ನಿರ್ಮಿಸಲಾಗಿದೆ. ಈ ನಡುಗುಡ್ಡೆಯಲ್ಲಿ ಸ್ಥಳೀಯರಿಗೆ ಆಪ್ತನಾಗಿರುವ ಮಾಂಗ್ಟೇಶ್ವರನ ದೇವಾಲಯವಿದೆ. ಬರತದ ಸಮಯದಲ್ಲಿ ಕಲ್ಲುಸೇತು ಮುಳುಗುವುದರಿಂದ ಈ ನಡುಗುಡ್ಡೆಗೆ ಹೋಗಲು ಸಾಧ್ಯವಿಲ್ಲ.

ಅಲ್ಲೊಬ್ಬ ಯುವಕನ ಬಳಿ ಕೇಳಿದಾಗ, ’ಬೇಗ ಹೋಗಿ ಬನ್ನಿ, ನೀರು ಬರುವ ಸಮಯ ಆಯ್ತು’ ಎಂದ. ಆಗ ಅಲ್ಲೇ ಇದ್ದ ವಯಸ್ಕರೊಬ್ಬರು, ’ಇನ್ನು ತಡಾ ಅದೆ. ಸಾವ್ಕಾಶ ಹೋಗ್ಬನ್ನಿ’ ಎಂದಾಗ ಯಾರನ್ನು ನಂಬುವುದು ಎಂದೇ ತಿಳಿಯದಾಯಿತು. ವಯಸ್ಕ ವ್ಯಕ್ತಿ ಅನುಭವದ ಆಧಾರದ ಮೇಲೆಯೇ ಮಾತನಾಡುತ್ತಿರುವಂತೆ ತೋರಿದ ಕಾರಣ, ಅವರಿಬ್ಬರಿಗೂ ಧನ್ಯವಾದ ಹೇಳಿ, ಸಾವ್ಕಾಶ ಹೋಗಿಬರುವ ನಿರ್ಧಾರ ಮಾಡಿದೆ.

ಈ ಕಲ್ಲುಸೇತುವಿನ ಕಲ್ಲುಗಳು, ಎರಡೂ ಕಡೆಯಿಂದ ಅಲೆಗಳ ಹೊಡೆತಕ್ಕೆ ಚದುರಿಕೊಂಡು ಬಿದ್ದಿವೆ. ಒಂದರ ಮೇಲೊಂದನ್ನು ಪೇರಿಸಿ ಇಡಲಾಗಿದ್ದ ಕಲ್ಲುಗಳು ಈಗ ಒಂದರ ಬದಿಯಲ್ಲಿ ಒಂದು ಇವೆ. ಒಂದು ಬದಿಯಲ್ಲಿ ಬಹುದೂರದವರೆಗೂ ಸಾಲಾಗಿ ಇಡಲಾಗಿರುವ ದೋಣಿಗಳು ಮತ್ತು ದೂರದಲ್ಲಿ ಪಶ್ಚಿಮ ಘಟ್ಟಗಳ ಸಾಲು, ಇನ್ನೊಂದೆಡೆ ನದಿಯೊಂದು ಬಂದು ಸಮುದ್ರಕ್ಕೆ ಸೇರುವ ತಾಣ ಹಾಗೂ ನಂತರ ಸಮುದ್ರಕ್ಕೆ ತಾಗಿಕೊಂಡೇ ಉದ್ದಕ್ಕೆ ಚಾಚಿರುವ ಬೆಟ್ಟಗಳು.

ಇದು ಪ್ರವಾಸೀ ತಾಣವಾಗಿರದ ಕಾರಣ, ಸ್ಥಳೀಯರಿಗೆ ಶರಧಿ ತೀರವೇ ಶೌಚಾಲಯ! ನೋಡಲು ಕಡಲತೀರ ಶುಭ್ರವಾಗಿ ಕಂಡುಬಂದರೂ, ಅಲ್ಲಲ್ಲಿ ಸ್ಥಳೀಯರು ’ಚುಕ್ಕೆ’ಗಳನ್ನು ಹಾಕಿರುತ್ತಾರೆ. ಉಬ್ಬರದ ಸಮಯದಲ್ಲಿ ಶರಧಿ ಈ ಎಲ್ಲಾ ಚುಕ್ಕೆಗಳನ್ನು ಗುಡಿಸಿ ಸಾರಿಸಿಬಿಡುತ್ತದೆ. ಆದರೂ ಸ್ವಲ್ಪ ಜಾಗರೂಕರಾಗಿ ಹೆಜ್ಜೆ ಹಾಕುವುದು ಎಂದಿಗೂ ಒಳ್ಳೆಯದು. ನಾನು ನಡೆದು ಹೋಗುತ್ತಿರಬೇಕಾದರೆ ಒಬ್ಬ ಚುಕ್ಕೆ ಹಾಕುತ್ತಿದ್ದ, ಇನ್ನೊಬ್ಬ ಹಾಕಲು ಹೋಗುತ್ತಿದ್ದ. ಹಿಂತಿರುಗಬೇಕಾದರೆ ಮಗದೊಬ್ಬ, ನಾನು ಬರುತ್ತಿರುವುದನ್ನು ಕಂಡು ನನಗೆ ಬೆನ್ನು ಮಾಡಿ ಕೂತೇಬಿಟ್ಟ!

ಕಲ್ಲಿನಿಂದ ಕಲ್ಲಿಗೆ ಜಿಗಿಯುತ್ತಾ ನಡುಗುಡ್ಡೆ ತಲುಪಿದೆ. ಅಲ್ಲಿ ಮಾಂಗ್ಟೇಶ್ವರನ ಸಣ್ಣ ದೇವಾಲಯ. ಸಮೀಪವೇ ಸಣ್ಣ ಬಾವಿ. ಬದಿಯಲ್ಲೇ ಒಂದು ಶಿವಲಿಂಗ.

ಮೊದಲು ಮಾಂಗ್ಟೇಶ್ವರನಿಗೆ ನಮಸ್ಕರಿಸಿದೆ. ಬಳಿಕ ನಡುಗುಡ್ಡೆಯಿಂದ ಕಾಣಬರುವ ದೃಶ್ಯಗಳ ಚಿತ್ರಗಳನ್ನು ತೆಗೆದೆ. ತದನಂತರ ಸುಮಾರು ೨೦ ನಿಮಿಷ ಶಿವಲಿಂಗದ ಬಳಿ ಕುಳಿತು ನನ್ನ ಜೀವನದ ಬಗ್ಗೆ ಅವಲೋಕನ ಮಾಡಿದೆ!

ಎದುರಿನಲ್ಲಿರುವ ಸಣ್ಣ ಬೆಟ್ಟಕ್ಕೆ ತೆರಳುವುದು ನನ್ನ ಮುಂದಿನ ಗುರಿಯಾಗಿತ್ತು. ಈ ಬೆಟ್ಟ ಸಮೀಪದಲ್ಲೇ ಇದ್ದರೂ, ಅಲ್ಲಿ ನದಿ ಸಮುದ್ರ ಸೇರುವ ಸ್ಥಳವಾಗಿದ್ದರಿಂದ, ಆ ಕಡೆ ದಾಟುವುದು ಅಸಾಧ್ಯ. ಇರುವ ಒಂದೇ ದಾರಿಯೆಂದರೆ, ಮರಳಿ ೩ ಕಿಮಿ ದೂರವಿರುವ ಊರಿಗೆ ಬಂದು, ನಂತರ ಮತ್ತೆ ೫ ಕಿಮಿ ಕ್ರಮಿಸಿ ಬೆಟ್ಟದ ತುದಿ ತಲುಪುವುದು.

ಈ ಬೆಟ್ಟದ ತುದಿಯಿಂದ ಸಮುದ್ರ ತೀರದ ಮತ್ತು ಮಾಂಗ್ಟೇಶ್ವರನ ನಡುಗುಡ್ಡೆಯ ವಿಹಂಗಮ ನೋಟ ಲಭ್ಯ. ಮೋಡಗಳ ಮರೆಯಿಂದ ಸೂರ್ಯದೇವ, ಮಾಂಗ್ಟೇಶ್ವರನ ವಾಸಸ್ಥಾನದ ಮೇಲೆ ಮಾತ್ರ ಬೆಳಕು ಚೆಲ್ಲುತ್ತಿರುವಂತೆ ಕಾಣುತ್ತಿತ್ತು!

ಈ ಗುಡ್ಡದ ತುದಿಯವೆರೆಗೂ ಮಣ್ಣಿನ ರಸ್ತೆಯಿದೆ. ಈ ರಸ್ತೆ ಹಾಗೇ ಮುಂದುವರೆದು ಬೆಟ್ಟದ ಇನ್ನೊಂದು ಪಾರ್ಶ್ವದ ಕೆಳಗಿರುವ ಕಡಲತೀರದ ಸಮೀಪ ಕೊನೆಗೊಳ್ಳುತ್ತದೆ.

ಬೆಟ್ಟದ ತುದಿಯಿಂದ ಮಾಂಗ್ಟೇಶ್ವರನ ಕಡಲತೀರ ಸಂಸ್ಕೃತ ಅಕ್ಷರ ’ಓಂ’ ತರಹ ಕಾಣುತ್ತದೆ. ಇಲ್ಲಿ ಸುಮಾರು ೩೦ ನಿಮಿಷಗಳಷ್ಟು ಸಮಯ ಕಳೆದೆ. ಅಲ್ಲಿ ಯಾರೂ ಇರಲಿಲ್ಲ, ಯಾರೂ ಬರಲಿಲ್ಲ. ಅಲ್ಲಿ ಕೆಳಗೆ, ಬರತದ ಸಮಯವಾಗಿದ್ದರಿಂದ ಕಡಲು ನಿಧಾನವಾಗಿ ಕಲ್ಲುಸೇತುವೆಯನ್ನು ಆವರಿಸಿಕೊಳ್ಳುತ್ತಿತ್ತು.

ಮಾಹಿತಿ: ಡಾ! ಎಸ್.ಡಿ.ನಾಯ್ಕ

ಶಿರಸಿಯ ಪುಢಾರಿ ಹಾಗೂ ಜಲಧಾರೆ

’ಶಿರಸಿಯಲ್ಲಿ ಒಬ್ಬರ ಪರಿಚಯ ಆಗಿದೆ. ಅವರಿಗೆ ೧೨ ಫಾಲ್ಸ್ ಗೊತ್ತಿದೆಯಂತೆ. ಯಾವಾಗ ಬೇಕಾದರೂ ಬನ್ನಿ ಎಲ್ಲಾ ಮಾಹಿತಿ ಕೊಡ್ತೇನೆ ಎಂದು ಹೇಳಿದ್ದಾರೆ. ಅಲ್ಲಿ ಎಲ್ಲಾ ಫಾಲ್ಸ್ ನೋಡಿ ಮುಗಿಸಿದ್ದಾರಂತೆ’, ಎಂದು ಒಂದೇ ಉಸಿರಿಗೆ ವಿವೇಕ್ ಉಸುರಿದಾಗ ನನಗೆ ಅಚ್ಚರಿ. ’೧೨ರಲ್ಲಿ ನಾವು ನೋಡದೇ ಇರುವುದೆಷ್ಟು?’ ಎಂಬ ಪ್ರಶ್ನೆಗೆ ವಿವೇಕ್ ನೀಡಿದ ಉತ್ತರ - ’ಒಂದಾದ್ರೂ ಇರಬಹುದಲ್ವೇ’ - ಅಶಾವಾದಿಯೊಬ್ಬನದ್ದಾಗಿತ್ತು. ರಾಜಕೀಯ ಪುಢಾರಿಯಾಗಿದ್ದ ಶಿರಸಿಯ ಈ ವ್ಯಕ್ತಿಯ ಬಗ್ಗೆ ನನಗೆ ಅದೇಕೋ ಸಂಶಯ ಬರಲಾರಂಭಿಸಿತ್ತು. ನಿಗದಿತ ದಿನದಂದು ಮುಂಜಾನೆ ೭ಕ್ಕೆ ಶಿರಸಿಯ ’ನಮ್ಮೂರ ಊಟ’ದಲ್ಲಿ, ಉಡುಪಿಯಿಂದ ನಾನು ಮತ್ತು ಅತ್ತ ಧಾರವಾಡದಿಂದ ವಿವೇಕ್ ಹಾಗೂ ಇತರರು ಭೇಟಿಯಾದೆವು.

ನಾಲ್ಕಾರು ಫೋನ್ ಕಾಲ್‍ಗಳ ಬಳಿಕ, ಅಂತೂ ೮.೩೦ರ ಸಮಯಕ್ಕೆ ಆ ವ್ಯಕ್ತಿ ಆಗಮಿಸಿದರು. ಈ ರಾಜಕೀಯ ವ್ಯಕ್ತಿಗಳೆಂದರೆ ನನಗೆ ಮೊದಲೇ ಅಲರ್ಜಿ. ನಾವು ೯೦ ನಿಮಿಷಗಳಿಂದ ಅವರಿಗಾಗಿಯೇ ಕಾಯ್ತಾ ಇದ್ದೇವೆ ಎಂಬ ಅರಿವಿದ್ದರೂ, ಆ ವ್ಯಕ್ತಿ ಒಳ ಹೊಕ್ಕ ಕೂಡಲೇ ಹೋಟೇಲ್ ಮಾಲೀಕ ಕೃಷ್ಣ ಕಮಲಾಕರ ಹೆಗಡೆಯವರ (ಇವರೀಗ ಗತಿಸಿದ್ದಾರೆ) ಬಳಿ ಕೊರೆತ ಶುರುವಿಟ್ಟುಕೊಂಡರು. ಹೆಗಡೆಯವರೇ ಅವರಿಗೆ ನಮ್ಮನ್ನು ತೋರಿಸಿ, ’ಅವರು ೭ ಗಂಟೆಯಿಂದ ನಿಮಗೆ ಕಾಯ್ತಾ ಇದ್ದಾರೆ. ನಾವು ನಂತರ ಮಾತನಾಡೋಣ..’ ಎಂದು ಅವರನ್ನು ನಮ್ಮತ್ತ ಕಳಿಸಿದರು.

ನಮ್ಮ ಬಳಿ ಬಂದ ಕೂಡಲೇ ಸಂಪೂರ್ಣ ರಾಜಕೀಯ ಧಾಟಿಯಲ್ಲೇ ಶಿರಸಿಯ ಗುಣಗಾನ ಮಾಡತೊಡಗಿದರು. ಐದಾರು ನಿಮಿಷಗಳು ಮುಗಿದರೂ ಫಾಲ್ಸ್ ವಿಷಯಕ್ಕೆ ಆತ ಬರದಿದ್ದಾಗ ನಾವಾಗಿಯೇ ನಮ್ರವಾಗಿ ಜಲಪಾತಗಳ ಬಗ್ಗೆ ಕೇಳಬೇಕಾಯಿತು. ಆತ ಉಂಚಳ್ಳಿಯಿಂದ ಶುರುಮಾಡಿ, ಶಿವಗಂಗಾ ಹೆಸರು ಹೇಳಿ, ಬೆಣ್ಣೆ ಉಸುರಿ, ಬಹಳ ಕಷ್ಟದಲ್ಲಿ ವಾಟೆಹೊಳೆ ಹೆಸರು ನೆನಪು ಮಾಡಿಕೊಂಡು ಹೇಳುವಷ್ಟರಲ್ಲಿ, ’ಅವೆಲ್ಲಾ ನೋಡಿ ಆಗಿದೆ’ ಎಂಬ ನಮ್ಮ ಉತ್ತರದಿಂದ ಸುಸ್ತು ಹೊಡೆದಿದ್ದ. ನಮಗೂ ಈತನ ಬೊಕ್ಕಸ ಬರೀ ಬೊಗಳೆ ಎಂದು ಅರಿವಾಗತೊಡಗಿತ್ತು. ನಂತರ ಯಾರಿಗೋ ಕರೆ ಮಾಡಿ ಇನ್ನೆರಡು ಹೆಸರು ಹೇಳಿದ. ’ಅವನ್ನೂ ನೋಡಿ ಆಗಿದೆ’ ಎಂದಾಗ ಮತ್ತೊಂದು ಕರೆ ಮಾಡಿ ಮಗದೊಂದು ಹೆಸರು ಹೇಳಿದ. ’ಅದನ್ನೂ ನೋಡಿ ಆಗಿದೆ’ ಎಂದು ನಾವು ಹೇಳಿದಾಗ ಆತನಿಗೆ ಮಾತೇ ಹೊರಡದಂತಾಗಿತ್ತು.

ನಾವು ಎಂಟು ಮಂದಿ ಆತನನ್ನು ಎಲ್ಲಾ ದಿಕ್ಕುಗಳಿಂದ ಸುತ್ತುವರಿದು ಹೊಸ ಜಲಧಾರೆಯ ಮಾಹಿತಿ ಸಿಗಬಹುದೆಂದು ಕಣ್ಣರಳಿಸಿ ನೋಡುತ್ತಿದ್ದರೆ, ಆತ ನಮ್ಮಿಂದ ಹೇಗೆ ತಪ್ಪಿಸಿಕೊಳ್ಳುವುದು ಎಂದು ಸ್ಕೆಚ್ ಹಾಕತೊಡಗಿದ್ದ. ’ನನ್ನ ಮನೆಯಲ್ಲಿ ಒಂದು ಪುಸ್ತಕದಲ್ಲಿ ಶಿರಸಿ ತಾಲೂಕಿನ ಎಲ್ಲಾ ಫಾಲ್ಸ್‌ಗಳ ಲಿಸ್ಟ್ ಮಾಡಿದ್ದೇನೆ. ಅದನ್ನ ಈಗ ತಗೊಂಡು ಬರ್ತೇನೆ’ ಎಂದು ಹೊರಡಲು ಅಣಿಯಾದ. ’ವಾಪಾಸ್ ಬರ್ತೀರಾ ತಾನೆ..?’ ಎಂದು ವಿವೇಕ ಮಾರ್ಮಿಕವಾಗಿ ಕೇಳಿದಾಗ, ’ಹೀಂಗ್ ಹೋದೆ. ಹೀಂಗ್ ಬಂದೆ’ ಎಂದ ಆ ವ್ಯಕ್ತಿ ಸರಸರನೆ ಹೊರಗೆ ಹೆಜ್ಜೆ ಹಾಕಿದರು. ಒಂದೆರಡು ನಿಮಿಷಗಳ ನಂತರ ಆ ವ್ಯಕ್ತಿಯ ಮೊಬೈಲ್ ಸ್ವಿಚ್‍ಡ್ ಆಫ್!!!

ಈ ವ್ಯಕ್ತಿಯ ಬಗ್ಗೆ ನನಗೆ ಸಂಶಯವಿದ್ದುದರಿಂದ ನನ್ನ ಬಳಿ ’ಪ್ಲ್ಯಾನ್ ಬಿ’ ತಯಾರಾಗಿತ್ತು. ’ಏನ್ರೀ ಮಾಡೋದು ಈಗ..’ ಎಂದು ವಿವೇಕ್ ಚಡಪಡಿಸುತ್ತಿರುವಾಗ, ’ಪ್ಲ್ಯಾನ್ ಬಿ’ ಮಂಡಿಸಿದೆ. ಮಂಡಿಸಿದ ಕೂಡಲೇ ಕಾರ್ಯಗತಗೊಳಿಸಲು ಮುಂದಾದೆವು. ಈಗ ಪ್ರಯಾಣ, ಚಾರಣದ ಸ್ಥಾನವನ್ನು ಆಕ್ರಮಿಸಿತ್ತು. ಆ ದಿನ ಎರಡು ಜಲಧಾರೆಗಳನ್ನು ನೋಡಿದೆವು. ಎರಡಕ್ಕೂ ಚಾರಣವಿರಲಿಲ್ಲ.

ಜಲಧಾರೆಯಿರುವ ಹಳ್ಳಿಯಲ್ಲಿ ಹಿರಿಯರೊಬ್ಬರ ಭೇಟಿಯಾಯಿತು. ಅವರಲ್ಲಿ ದಾರಿ ಕೇಳಿದಾಗ ’ಅನೀಶ’ ಎಂಬ ಪೋರನನ್ನು ಮಾರ್ಗದರ್ಶಿಯಾಗಿ ಕಳುಹಿಸಿದರು. ವಯಸ್ಸು ಆರೇ ಆದರೂ ಮಾತಿನಲ್ಲಿ ತುಂಬಾ ಮುಂದೆ. ನಮ್ಮ ಬಗ್ಗೆ ಎಲ್ಲಾ ಮಾಹಿತಿ ಕೇಳಿ ಪಡಕೊಂಡ! ನಾವೆಲ್ಲರೂ ಆತನನ್ನು ಹಿಂಬಾಲಿಸಿದೆವು.

ತೋಟದ ನಡುವೆ ಅಡಗಿರುವ ಸಣ್ಣ ಜಲಧಾರೆ ಭೋರ್ಗರೆಯುತ್ತಿತ್ತು. ಸುಮಾರು ೪೦ ಅಡಿ ಎತ್ತರದಿಂದ ಧುಮುಕುವ ಈ ಹಳ್ಳ ನಂತರ ಹಾಗೇ ಮುಂದುವರೆದು ರಾಜ್ಯದ ಅತಿ ಸುಂದರ ಹಾಗೂ ಪ್ರಸಿದ್ಧ ಜಲಪಾತವೊಂದನ್ನು ನಿರ್ಮಿಸುತ್ತದೆ.

ಜಲಧಾರೆಯ ನೇರ ಮುಂದೆ ನಿಂತು ಚಿತ್ರ ತೆಗೆಯುವುದು ಅಸಾಧ್ಯವಾಗಿತ್ತು. ಬದಿಯಿಂದ ಸಮೀಪ ನುಸುಳಿ ಒಂದಷ್ಟು ಚಿತ್ರಗಳನ್ನು ತೆಗೆದೆವು.

ಜಲಧಾರೆಯ ರೌದ್ರಾವತಾರದ ಅಂದವೇ ಬೇರೆ. ಧುಮ್ಮಿಕ್ಕಿ ಹರಿಯುವಾಗ ಜಲಧಾರೆಯ ನಿಜವಾದ ಎತ್ತರದ ಅರಿವಾಗುವುದಿಲ್ಲ. ನೀರಿನ ಹರಿವು ಎತ್ತರವನ್ನು ಮರೆಮಾಚುತ್ತದೆ.

ಅಂದು ಜಲಧಾರೆಯ ಸೊಬಗನ್ನು ನಾವೆಲ್ಲಾ ಆನಂದಿಸಿದೆವು. ಶಿರಸಿಯ ’ಕಾಮೆಡಿ ಕ್ಲೋನ್’ನಿಂದ ನಿರಾಶದಾಯಕವಾಗಿ ಆರಂಭವಾದ ದಿನ ಈ ಜಲಧಾರೆ ಹಾಗೂ ಇನ್ನೊಂದು ಸಣ್ಣ ಜಲಧಾರೆಯ ಭೇಟಿಯ ಬಳಿಕ ಸಂತೋಷವಾಗಿಯೇ ಕೊನೆಗೊಂಡಿತು.

ಮಾಹಿತಿ: ರವಿ ಹೆಗಡೆ