ಬುಧವಾರ, ನವೆಂಬರ್ 01, 2006

ಲೈನ್ಕಜೆ ಜಲಪಾತಕ್ಕೆ ಚಾರ(ಪ್ರಯಾ)ಣ


ಅಕ್ಟೋಬರ್ ತಿಂಗಳ ಮಂಗಳೂರು ಯೂತ್ ಹಾಸ್ಟೆಲ್ ಕಾರ್ಯಕ್ರಮ ೨೯ರಂದು ಲೈನ್ಕಜೆ ಜಲಪಾತಕ್ಕೆಂದು ನಿರ್ಧಾರವಾಗಿತ್ತು. ಇದೊಂದು ಚಾರಣವಲ್ಲದೆ ಪಿಕ್-ನಿಕ್ ತರಹದ ಕಾರ್ಯಕ್ರಮವೆಂದು ತಿಳಿದಿದ್ದರೂ, ಜಲಪಾತವೊಂದನ್ನು ನೋಡಿದಂತೆ ಆಗುತ್ತದೆ ಎಂದು ಉಳಿದ ೨೦ ಚಾರಣಿಗರನ್ನು (ಪ್ರಯಾಣಿಗರನ್ನು) ಸೇರಿಕೊಂಡೆ.

ಗಣಪತಿಯವರ ಮಾರ್ಗದರ್ಶನದಲ್ಲಿ ಸುಮಾರು ೧೧೫ ಕಿ.ಮಿ ಗಳ ಪ್ರಯಾಣದ ನಂತರ ಲೈನ್ಕಜೆ ಮನೆಯಲ್ಲಿ ಮೋಹನನ ಟೆಂಪೊ ಬಂದು ನಿಂತಿತು. ಮಂಗಳೂರು ಯೂತ್ ಹಾಸ್ಟೆಲ್ ಚಾರಣ ಕಾರ್ಯಕ್ರಮಕ್ಕೆ ರೆಗ್ಯುಲರ್ ಟೆಂಪೊ ಯಾವಾಗಲೂ ಮೋಹನನ 'ಶಕ್ತಿ'. ಇದೊಂದು ಹೆಸರಿಗೆ ತಕ್ಕಂತೆ ಭಲೇ ಶಕ್ತಿಯುತವಾದ ಟೆಂಪೊ. ಯಾವುದೇ ಪಾಳುಬಿದ್ದ ರಸ್ತೆಯಿರಲಿ, ನೆಗೆದುಬಿದ್ದ ರಸ್ತೆಯಿರಲಿ, ಹಳ್ಳ ಹಿಡಿದ ರಸ್ತೆಯಿರಲಿ, ಕಡಿದಾದ ತಿರುವುಗಳುಳ್ಳ ಕಲ್ಲು ಮಣ್ಣುಗಳಿಂದ ಕೂಡಿದ ಕಿರಿದಾದ ಮಣ್ಣಿನ ರಸ್ತೆಯಿರಲಿ... ಮೋಹನ ಕಿರಿಕಿರಿ ಮಾಡದೆ ತನ್ನ 'ಶಕ್ತಿ'ಯನ್ನು ಓಡಿಸುತ್ತಾನೆ. ಈ ಬಾರಿಯೂ ಅಷ್ಟೇ. ಕೊನೆಯ ಐದಾರು ಕಿ.ಮಿಗಳಷ್ಟು ರಸ್ತೆ ಜೀಪ್ ಪ್ರಯಾಣಕ್ಕೆ ಮಾತ್ರ ಸೂಕ್ತವಾಗಿತ್ತಾದರೂ, ಮೋಹನ ತನ್ನ 'ಶಕ್ತಿ'ಯನ್ನು ಹಸನ್ಮುಖಿಯಾಗಿಯೇ ಓಡಿಸಿದ. ಇದೊಂದು ಸಾಟಿಯಿಲ್ಲದ ಟೆಂಪೊ ಮತ್ತು ಮೋಹನ ಒಬ್ಬ ಸಾಟಿಯಿಲ್ಲದ ಚಾಲಕ.

ಲೈನ್ಕಜೆ ಮನೆಯಿಂದ ೧೫ ನಿಮಿಷಗಳಷ್ಟು ನಡಿಗೆಯ ಬಳಿಕ ಜಲಪಾತದ ಪ್ರಥಮ ಹಂತ. ೪೫ ಅಡಿಗಳಷ್ಟು ಎತ್ತರವಿರಬಹುದು. ಇಲ್ಲಿ ಸ್ನಾನ ಹಾಗೂ ಟೈಮ್-ಪಾಸ್ ಮಾಡಿದ ಬಳಿಕ ಎರಡನೇ ಹಂತದ ಬಳಿಗೆ ಬಂದೆವು. ಇದು ಸುಮಾರು ೩೦ ಅಡಿಯಷ್ಟಿರಬಹುದು. ಇಲ್ಲಿ ಮತ್ತೊಮ್ಮೆ ಸ್ನಾನ ಹಾಗೂ ಟೈಮ್-ಪಾಸ್ ಮಾಡಿದ ಬಳಿಕ ಬ್ಯಾಕ್ ಟು ಲೈನ್ಕಜೆ ಹೌಸ್. ನಂತರ ಲೈನ್ಕಜೆ ಮನೆಯಲ್ಲಿ ಮತ್ತಷ್ಟು ಟೈಮ್-ಪಾಸ್. ಹಳೇ ಕಾಲದ ಮನೆಯಾಗಿದ್ದರಿಂದ ಅಲ್ಲಲ್ಲಿ ಕೋಣೆಗಳು, ಉಪ್ಪರಿಗೆಗಳು, ಮಟ್ಟಿಲುಗಳು ಮತ್ತಿತರ ವಿಸ್ಮಯಗಳು. ಮನೆಯ ಅಜ್ಜ ಮುತ್ತಜ್ಜಂದಿರು ತಾವು ಶೂಟ್ ಮಾಡಿ ಕೊಂದ ಆನೆಗಳ ದಂತದೊಂದಿಗೆ ವೀರಾಧಿವೀರರಂತೆ ಪೋಸ್ ಕೊಟ್ಟು ತೆಗೆಸಿದ ಚಿತ್ರಗಳನ್ನು ನೋಡುವ ಹಿಂಸೆ. ಮನೆಯಲ್ಲಿರುವ ಪುಸ್ತಕಗಳ ಸಂಗ್ರಹ ಸಾಟಿಯಿಲ್ಲದ್ದು. ಯಾವ ವಿಷಯದ ಬಗ್ಗೆ ಪುಸ್ತಕವಿಲ್ಲ ಎಂದು ಕಂಡುಹುಡುಕುವುದೇ ಒಂದು ಚ್ಯಾಲೆಂಜ್. ಒಟ್ಟಾರೆ ಮನೆ ಮಾತ್ರ ನೋಡಲು ಯೋಗ್ಯವಿರುವಂತದ್ದು. ಪ್ರಥಮ ಸಲ ಬಂದ ಐದಾರು ಮಂದಿಗೆ 'ಚಾರಣ' ಯಾವಾಗಲೂ ಹೀಗೆ ಬಹಳ ಸುಲಭ ಎಂಬ ಕಲ್ಪನೆ. ಈ 'ಚಾರಣ' ಅದ್ಭುತವಾಗಿತ್ತು ಎಂಬ ಫೀಡ್-ಬ್ಯಾಕ್ ಬೇರೆ!

2 ಕಾಮೆಂಟ್‌ಗಳು:

VENU VINOD ಹೇಳಿದರು...

hello rajesh
It seems you had enjoyed your picnic to linekaje falls. Liked your account on the experience of trip. As you said, Mohan's SHAKTI is very very mighty. So shall we say LAGE RAHO MOHAN BHAI :)

ರಾಜೇಶ್ ನಾಯ್ಕ ಹೇಳಿದರು...

right venu. lage raho...can be siad in case of mohan. 1 hell of a driver.