ಇಲ್ಲೊಂದು ಚಂದದ ಜಲಧಾರೆ

ಮುಖ್ಯ ರಸ್ತೆಯಿಂದ ಒಂದು ಕಿ.ಮಿ ಇಳಿಜಾರಿನ ರಸ್ತೆಯನ್ನು ಕ್ರಮಿಸಿದರೆ ಈ ಪುಟ್ಟ ಹಳ್ಳಿ. ಇಲ್ಲಿ ಮನೆಯೊಂದರ ತೋಟದಲ್ಲಿ ಒಂದೈದು ನಿಮಿಷ ನಡೆದು ಪ್ರಾಂಗಣ ಗೋಡೆಯನ್ನು ಹಾರಿದರೆ ಮತ್ತೊಂದು ಕಡೆ ಹಳ್ಳಕ್ಕೇ ಕಾಲಿಟ್ಟಂತೆ. ಮರಗಳ ಮರೆಯಿಂದ ಸ್ವಲ್ಪ ಮುಂದೆ ಬಂದರೆ ಅಡಿಕೆ ತೋಟಗಳ ನಡುವೆ ಧುಮುಕುತ್ತಿರುವ ಈ ಚಂದದ ಜಲಧಾರೆಯ ದರ್ಶನ.


ಮನೆಯ ಬಳಿ ತೋಟಕ್ಕಿಳಿಯದೇ ಹಾಗೆ ಮೇಲಿನಿಂದಲೇ ನಡೆದರೆ ಜಲಧಾರೆಯ ಮೇಲ್ಭಾಗಕ್ಕೆ ಬರಬಹುದು. ಸುಮಾರು ೫೦ ಅಡಿ ಎತ್ತರವಿರುವ ಈ ಜಲಧಾರೆ ಮಳೆಗಾಲದ ಅತಿಥಿ. ವ್ಯವಸಾಯಕ್ಕಾಗಿ ಹಳ್ಳಿಗರು ಜಲಧಾರೆಯ ಮೇಲ್ಭಾಗದಲ್ಲಿ ಒಡ್ಡನ್ನು ನಿರ್ಮಿಸಿ ಹಳ್ಳದ ನೀರನ್ನು ಹಳ್ಳಿಯೆಡೆ ಹರಿಸಿಕೊಳ್ಳುವುದರಿಂದ ಮಳೆಗಾಲದ ನಂತರ ಇಲ್ಲಿ ನೀರಿರುವುದಿಲ್ಲ.


ಮಳೆ ಬೀಳಲಾರಂಭಿಸಿತ್ತು. ಆದರೂ ಜಲಧಾರೆಯ ಅಂದವನ್ನು ಹಳ್ಳದ ಮಧ್ಯೆ ಇರುವ ಬಂಡೆಗಳಲ್ಲೊಂದರ ಮೇಲೆ ಆಸೀನರಾಗಿ ೧೫-೨೦ ನಿಮಿಷ ಸವಿದೆವು. ಹಳ್ಳ ಈ ರೀತಿ ಹರಿಯುತ್ತಿರುವಾಗಲೇ ಇಲ್ಲಿಗೆ ಬರಬೇಕು. ಆಗಲೇ ಈ ಜಲಧಾರೆ ನೋಡಲು ಚಂದ.